wos oes noamaal is

schnidsl essn is noamaal
des waaß a jeda wos a mensch is
a grülarei a bia dazua a wuaschd med senf
a brod a schmoezz kaa gmias
wos uandlix aufn töla hoed
a weindal gengan duaschd
a schnapsal fia de sölegkeid

a woonung med balgon
a eigans heisl haum filleichd
in ualaub auf lignano foan
oda med ol inklusif auf antalia
de sau rauslossn ob und zua
mea brauch ma ned
des is noamaal des is uns gnua

noamaal is dass ma waaß
waun ma de goschn hoedn soe
ned ausselana und ned auffoen göö
buggln oaschgräun wo s wos bringd
und dredn wo s grod geed
schlau sein oeda owezaan
so is noamaal

auto foan is iiwahaubd noamaal
an geilen flizza foan woen ee kloa aa
min auto zua trafik foan
fia r amoe lotto und a bakkl tschik
miass ma ned redn
is noamaal noamaal noamaal
des loss ma uns ned nema

dass d schiach bisd is hoed aa noamaal
dass d blaad wiasd oed wiasd
hinnich iagendwaun und fäusd
ausgfressn und augfressn
a gfriis oes wia r a dode sau
de lefdsn owe bis auf d ead:
oes noamaal

an mal untan rokk greifn is aa noamaal
an mal beileifig nua de dudln duachmassian
se hom s jo gean
a bissal grabschn und
daun gschwind a bussl aufedrukn
waun sa se ziian waaßd ee
is des noamaalsde fon da wööd

weiwa pudan is noamaal
dazua san s do des hod da heagot scho so grichd
de weiwa schlogn waun se ned schbuan
daschlogn aa waun s d am end
da aundas ned zum höfn waasd
ghead aa dazua
wos soe s d denn tuan

und de gschropn waun de neafn
dass dafia eanare waatschn griagn is noamaal
des faschdengan s söba aa
s hod kan no gschod
de gschropn enan köla schbean
wen schdead s
en köla kau ma so fü schbüün

a hobbe hom is gaunz noamaal
woffn saumön liadln singan
a scheenes pekal mid an hogngreiz
und hitlazeigs en gabinet oeda
des is nix oags is tradizion
dass ma de scheene große zeid
in eean hoed ist nua noamaal

do wos i ned hom kau des san
de gaunzn wüüdn nega asülantn
de lesbn linkn bochanen
de judn auslända und s greane gsindl
schdudiade gscheitaln kinstla dichda
de indelegduölln scheissa olle
de gutmenscha med eanara moraal
de woen ma ned de brauch ma ned
de ghean daschlogn vagaasd und aufghengd
fia noamaal

do brauchd ma kana wos vazöön
mia san ned so mia woen a rua
san gmiadlich lusdig fesch beinaund
mia san de mitte mia san s foek
und wos noamaal is bschdiman mia
heasd wäu noamaal is dass ma waaß
wos oes noamaal is und wos ned
a wauns d a wee bisd
bisd noamaal
do imma no wos bessas.